黃梓樂與鄭有傑
Sc1A
時：日
地：茶餐廳(內)
人：黃梓樂、Eliz
十二月十三日，對筆者來說，只是普通不過的一天。但對於梓樂來說，今天很特別，因為——
他考完試了
闊別多日，今日再見面，他感覺輕鬆多了，甫一坐下，已經按耐不住興奮的心情。「今日考完試喇，等派卷，打機，可以放鬆吓」對於我這個闊別校園多年的人來說，至今仍感受到考試過後，那種春雨過後，萬物萌動的心情。
考試，真是令人又愛又恨。恨，因其帶來沉重壓力，愛，是它總伴隨著假期。但稍一不慎，考試失利，對學生的打擊尤如五雷轟頂。《年少日記》中的鄭有傑（黃梓樂飾演），每一次考試對他來說就如行刑，成績高低決定了生活順逆。
說起鄭有傑，我想沒有人比梓樂更清楚他，畢竟他以「鄭有傑」的身份活了一段日子。如今從角色中抽離，變回活潑開朗的黃梓樂，我很好奇他是怎麼看鄭有傑。梓樂想了想，神色有點遺憾。
「其實佢係一個好努力嘅人，但佢永遠得唔到佢想要嘅嘢。佢永遠得唔到嗰個成績，永遠得唔到父母嘅愛，永遠彈琴彈得唔好。」
而最身同感受的一場，是deleted scene。
「印象最深刻係同Rosa媽媽嗰場戲，我抽離唔到角色真係喊得好犀利，同埋我覺得，嗰一場真係好慘。佢本身覺得媽媽係幫緊佢，但媽媽講啲嘢越黎越奇怪，講要幫返爸爸。啲家長有時講嘢呢，唔係咁啱聽......（想了想）唔知點講，會離咗題，明明係講緊小朋友嘅好，但點知無啦啦講咗第二樣嘢」
這時候，坐在旁邊的梓樂媽媽Eliz 憶述當日情況：她過去安慰梓樂，梓樂卻說「唔好同我講嘢住」，他需要獨處的空間。不久，導演也過來了，想安慰他。今次輪到媽媽截住導演，「先讓他嘗試吧，他遲早都要學會抽離角色。」
「佢好有自己諗法，同埋佢覺得自己控制得到。（稍頓）我都要放吓手。」Eliz 說道。
是的，留一些空間給孩子成長很重要，但《年少日記》中的鄭自雄，似乎不留餘地，無時無刻都在強逼鄭有傑前進。
我問梓樂，假如你是鄭自雄，你又會怎樣對鄭有傑？
「我唔會鬧佢，唔會打佢，可能問佢有咩困難，用返一個正面嘅態度。跟住帶佢去睇心理醫生，第二就係睇讀寫障礙障礙醫生——我真係懷疑佢係咪有讀寫障礙，因為佢已經好努力。但係都攞唔到嗰個成績」梓樂對於鄭有傑的了解，比我想像中深入，我很好奇拍攝當時年僅8歲的他，是如何進入角色？「其實我冇啲好Pro嘅方法去演，都係問吓導演，之後諗吓有傑嘅感受。導演俾好大自由度我，我做咗嗰樣嘢，佢覺得幾好喎，咁就繼續嚟。如果導演話唔得啦，我咪再試第二樣嘢囉。」
言談間，感受到梓樂對演戲的熱忱，是與生俱來。 Eliz 憶述，當年在一次偶然的機會，收到廣告拍攝邀請，就問問梓樂意向，沒想到他痛快地答應了。「第一個廣告其實幾慘痛，我諗住佢會怕，以後都唔拍嘢，點知佢又鍾意喎——」
就是這個偶然的機會，梓樂開始了自己的演藝生涯。
- - 待續 - -
text shun
photographer matt
stylist hubert
makeup vanessa
延伸閱讀
相關影片
