忍住眼淚，也要忍住笑容

封面人物

Jan 22

Written By 時地人事 Since They Run Scene

11歲已有幾年工作經驗，回想入行經過，梓樂也有一種「老夫話當年」的感覺。

「我五歲差唔多啦，就第一次出嚟拍嘢。唔記得係一個洗潔精定洗衣液廣告，要夾住個鼻。其實我好想喊，但唔知點解嗰時我冇喊。 (稍頓) 廣告要開心㗎嘛，你唔會唔開心㗎嘛。跟住就鍾意咗拍嘢，同埋，訓練咗我意志力。」

在梓樂的眼中，廣告要呈現開心的感覺，他所飾演的角色都是活潑開心，哪怕拍攝過程不開心而想哭，也要忍住。

而電影卻不一樣，他接觸到的戲劇，都是以「喊戲」為主，有試過cut機後想笑，為免破壞氣氛而忍住。

「有時候呢，拍電影我完成咗個「喊戲」啦。佢哋沈澱咗喺個「喊戲」度，我無啦啦喺度大笑，會好尷尬囉。」

梓樂參演過多部電視劇與電影，累積了不少演出經驗，但拍攝《年少日記》時，他坦言仍有壓力。「大壓力啊，第一次咁重戲份。」他憑著電影中出色的演出，獲提名金馬獎最佳男配角。回憶入圍過程，他露出天真的笑容。「我開頭都唔知咩黎，原來報咗呢樣嘢㗎？乜鬼野，報咗金馬獎男配角！？」

及後，當他得知到金馬獎是歷史最悠久的華語電影獎，亦是如今華語電影業界最具影響力與代表性的電影獎之一，他覺得很不可思議，並謙虛表示「其實我都幾滿意《年少日記》嘅表現，不過我就唔敢妄想有咩獎。但係呢，導演攞獎嗰吓，真係超興奮，仲要係最佳新導演喎。我哋全部人都喺度嗌、尖叫—— 阿卓！」

他一邊回想，一邊手舞足蹈，彷彿重臨當日情景。