我們仨，Synchronized | 區樂恆、廖頴琛、張戩仁

封面人物

Apr 8

Written By 時地人事 Since They Run Scene

Sc2 - 夜 - 柴灣錄音室 - 區樂恆、廖頴琛、張戩仁

#vol.4

Sc2 - 夜 - 柴灣錄音室 - 區樂恆、廖頴琛、張戩仁 #vol.4

其實，我有啲心虛

完成一天的工作，三人顯得有點疲倦。Hanz（區樂恆）坐在鋼琴前「呼吸」，Iris（廖穎琛）則坐在混音控台旁邊若有所思，而Jolyon（張戩仁）背靠在沙發，打量著我。從文字上理解，他們彷彿散落四周，坐得好開，但其實他們各自的距離，不足一步，幾乎比肩而坐。無他，因為個錄音室不大，目測只有200多尺。

這裡麻雀雖小，卻五臟俱全。混音控台、Outboard Gear、鋼琴、吉他等樂器一應俱全，最令我印象深刻的是那與電話亭同款的錄音室。Jolyon：「細還細，小野（盧鎮業）都係喺入面錄過音㗎！」失敬，我哪敢小看這個錄音室，在座三位貴為第四十二屆香港金像獎最佳原創電影音樂提名，就算沒有錄音室，都是身經百戰的配樂師。

「我咁講，啱唔啱呀，Jol？」我問。
「其實……我係有啲心虛嘅。」Jolyon笑說。
嗯！？此話何解。Jolyon：「好似頭先食飯，一坐低你就話『究竟有幾多係你做嘅！？』其實我都會諗，究竟有幾多嘢係我做嘅呢？」

據我所知，他們除了配樂師的身份外，還有其他身份。如Iris是Singer-Song writer，Hanz是獨立音樂人，而Jolyon則是一位編劇。三人之中，唯有Jolyon的本業與音樂好似有一段距離，所以他經常自嘲是「菠蘿雞」。

「其實我有問過佢哋，我嘅加入係有冇幫助，咁佢哋可能好俾面，就話有嘅，而家可以問下係咪真實說話啦。」Jolyon 一臉嚴肅地望向二人，接著錄音室迎來十多秒的死寂，然後是幾人的乾笑聲。

我們仨，Synchronized

Iris：「我記得呢……」Jolyon：「嗱，見到你有猶豫啦。」Hanz嚴肅的表情下，是嘴角忍笑的抽搐。Iris稍稍平復心情，解釋到。她覺得Jolyon身兼編劇和配樂師身份的人很少，而Jolyon對戲劇和音樂有很深的認識，Iris：「大家知道佢個Database好豐富，佢會爆勁多Idea，俾好多Reference，呢個係阿Jol好大嘅優點嚟。」

Jolyon 舒了一口氣，笑意漸濃：「好！我接受，到你講。」突然指向Hanz。Hanz一愣，眉頭緊皺：「欸，講真話？其實，就唔係幾好受嘅。」Jolyon：「你講大話！」眾人哄笑。

他們互相調侃，卻也有一種樂也融融的感覺。片刻後，Hanz 端正坐姿：「認真先，其實呢……之前夾Band話到俾我聽，一個人整出黎嘅嘢，同埋一班人整出黎嘅嘢，係好唔同嘅。一個人整，係實踐緊自己嘅幻想，一班人合作，係總會有surprise。」Iris接著說：「我哋三個個性好唔同，就算係同一部琴，都會彈出三種質地，例如Hanz比較瀟灑，我係好Emotional，阿Jol係Calm。」Jolyon：「個情況有啲似寫劇本圍度咁，打開個劇本逐場睇，邊個諗到啲嘢就行埋個Keyboard度彈，大家都掟嘢出黎。」

他們的合作不能說天衣無縫，但卻感受到相輔相成。

除咗音樂，所有嘢都可以Visualize

我問他們，一般的工作流程是怎樣的。Hanz說工作找上門的時候，電影都接近Lock cut，導演一般會看著影片解釋一次，有時會附送一個Playlist作參考，有時卻只有形容詞或者Mood。Jolyon 補充到：「導演其實每一樣嘢都要負責，就算現場一隻杯佢都要執靚個Frame。但音樂呢，我發現好難具象，就算導演幾叻都好，通常好難Specific講到想點。」所幸大部份導演都善於說故事，總能以生動的例子來講解，如電影《毒舌大狀》的導演吳煒倫，他是這樣形容電影其中一段音樂：「宜家個怪獸出咗黎，出得太早，隻怪獸唔好咁快出黎。」Jolyon三人隨即意會，即「Build up」要耐啲。

配樂，始終都係配

他們的工作除了要解構導演抽象的想法，還要審慎思考每一首音樂存在的合理性。Jolyon：「配樂呢，始終係配，佢永遠唯一嘅功用就係去幫套戲，我哋三個最Synchronize個位就係，如果個戲、畫面、演員已經很夠力，音樂可以唔落，就唔落。」Iris：「我哋都係Recommend留白，多過夾硬用。」Hanz點了點頭：「我哋工作嘅崗位，就係點樣用音樂、聲音去講故事。」

提名

我問他們提名金像獎有什麼感想。
Hanz笑了笑：「我當然期待呢個機會出現，但內心深處係冇諗咁多，淨係想我做到一套好戲，我承唔承受到一套好戲先？我係因為個故事吸引，鍾意呢個魅力，我先去做。」

Iris也笑了笑：「咁我當然都開心啦，首先自己鍾意，做得開心，好似有幫到啲，音樂上又Fit到套戲。有一種Satisfy，個經驗幾Reward。」

Jolyon皺起眉頭，若有所思：「提名對我嘅意義係⋯⋯我阿媽好開心！」我露出疑惑的眼神，Jolyon：「真係㗎，講真我哋呢行，呢啲成績佢先睇到㗎嘛，佢唔會知到你做得好唔好，佢唔會知喺人地眼中你係點㗎嘛，因為對佢黎講，個行業離佢好遠，呢個提名就係好Concrete嘅Evidence，我阿媽真係好高興。」

Jolyon頓一頓，很溫柔地說：「我覺得，呢個意義係好夠！」