演戲不是模仿 | 梁雍婷
Sc3 - 夜 - 茶水間 - 梁雍婷
#vol.4
Sc3 - 夜 - 茶水間 - 梁雍婷 #vol.4
夜色漸濃，天空尚有一絲黃昏餘溫，一聲溫柔點綴了如斯美景：「Hello！我哋依家做訪問？」是Rachel @rachellyt，她手握著一包手捲煙走進茶水間，我邀她坐下說：「係呀，我哋坐呢度呀。」Rachel緩緩坐下問我：「你介意我哋一邊傾，我一邊食煙嗎？」我搖搖頭，她便緩緩捲起煙絲，抬頭望望窗外，然後蹲起身伸手把全打開了的窗關起一半，「我怕出面啲車聲影響你錄音，又怕啲煙焗親你，關一半可能會好啲。」跟Rachel相處，就是這麼放鬆舒服，因為她的眼中會看到你。
演戲不是模仿
如果不太認識Rachel，相信大部分人都會覺得她應該是一個天才型演員，否則怎會她第一部參演的電影《藍天白雲》便有如此重戲份，還要飾演天生患有心漏病，計劃謀殺雙親的高難度角色「Connie」？「我其實考過兩次演藝學院都唔收⋯⋯」因為有親戚經營模特兒公司關係，Rachel自小就有很多「演戲」經驗，「雖然我細細個就有好多拍廣告、對鏡頭表演嘅經驗，但其實我只係見電視入面啲人做咩，我跟住做，我只係模仿，唔係演戲，當時亦無人讚過我做戲叻。」
直到15歲那年，在拍攝一些短片時，一場喊戲才令她知道演戲是一門無底深淵的專業。「嗰時導演叫我喊，我心諗死喇，突然間點喊呀？我扮到喊樣，但扮唔出眼淚喎。所以我叫導演摑咗我30幾巴，我以為生理上可以強迫到自己流眼淚，但原來唔得。」Rachel說那時候才知道演戲不是模仿，是要真正投入角色，笑角色所笑，哭角色所哭。就這樣Rachel開始了追求「好戲」之路。
港女都有好多種
我明白愈慘、愈怪、愈扭曲的角色愈有話題性及發揮空間，但Rachel令人印象深刻的角色，大多都是這類型令人揪心可憐的社會邊緣人，怕不怕因此而被定型，找不到突破？
「仲有成日演港女，哈哈。」Rachel笑著話，「框架向來都係自己俾自己，人哋框唔到你。所以我一直相信飾演咩角色都好，重點唔係角色本體係咩，而係你為角色添加咗啲咩驚喜。」她一語中的道破了演員最害怕的「框架」與「定型」問題，「好似要演港女，我相信每個港女都有自己嘅故事，唔同嘅港女故事就會衍生千萬種貪錢嘅程度同形式，所以睇你點去突出每個人嘅人性。」也就是說你如何把每個獨特的故事說得精彩，精彩就沒有框不框架。
如果電影真是虛構，世界會更美好
在《白日之下》中，Rachel再次飾演弱勢社群的慘情角色，是一名中度智障的角色「黃小鈴」，但Rachel表演依舊出色，完美示範了剛才所說：精彩就沒有框架的理論。早前更於「第17屆亞洲電影大獎」中得到「最佳女配角」獎，並於「第42屆香港電影金像獎」中提名「最佳女配角」，成為大熱人選。不過Rachel沒有因此感受太多歡樂，感動的只是團隊的努力塑造得到了認同，其餘的只有諷刺：「黃小鈴的故事是真人真事改編，而社會上亦有很多這類不幸的人，我投入過小鈴的情感，深深感受到那是比電影所呈現出來的痛苦多100倍、1000倍。他們每天為生活、為生存掙扎⋯⋯」兩滴眼淚從Rachel眼角流了下來。
「我⋯⋯知道他們⋯⋯好想走出痛苦⋯⋯同埋輪迴⋯⋯」Rachel哽咽，她盡力抑制著「切身」的傷心，向我訴說對弱勢社群那丁點她自問微不足道的感受。擦掉眼淚，回了一口氣，她續道：「我拎咗佢掙扎一世嘅經歷同痛苦，然後接受大家嘅掌聲，我覺得呢件事其實好扭曲、好難受。」
我安慰她說：「傻啦，電影可以影響生命。我相信因為你嘅演出，令好多人睇到同關心小鈴呢班弱勢社群。你幫咗佢哋好多。」藝術最殘忍的地方就是要紀錄當下，赤裸裸地紀錄著。「我好希望佢哋可以走出痛苦，同埋如果以後電影可以唔使用真實故事影響人，一切都只係虛構，咁就好喇。」Rachel苦笑說。
歸零
氣氛沉重了一點，我們轉了個話題談談下一個角色，Rachel笑說暫時未有下一個角色，不過她已做好準備迎接，「我覺得演員要為下一個角色負責任，唔可以沉溺喺上一個角色嘅情緒、失望同虛榮之中，要一切歸零，以零重量姿態開始新角色。」她說不只是演員，其實做人也是一樣，「做人處事都係，唔好因為一路走嚟賺到咩，或者累積到咩，就放棄你嘅初心。愈多名利，你愈要貼地生活，常常清空自己，唔可以自滿。人，一旦放棄咗自己初心，你所做嘅嘢就會變咗質感。」
「我們做演員，幾多人識定唔識，落咗妝、換返衫，咪又係喺街追巴士、食吓煙。演戲就係要感受最純粹嘅生活。」
工作完結，我站在街邊等車，穿回一身便服的Rachel突然從我身邊走來，身邊沒有經理人及助手的她，問我觀塘應該走哪個方向，我回答她後，她笑容滿面跟我說了聲bye bye，轉身從容地於林林工廠大廈之間走遠了。
-
#時地人事 #sincetheyrunscene #梁雍婷 #白日之下
Text 永文
Artist @rachellyt
Photographer @makyau2
Photo Assistant @cccarol.c @Jasonhch @yipchan_ @ryann.fols
Stylist @mildredlo
Art Direction @lilyamahiro @waiyiiii_
Makeup @deepmakeup
Hair @oscarnganhair
Graphics Design @yikki.design
Wardrobe
@sportmax @giuseppezanotti @swarovski @louisvuitton @theattico @farfetch
@loewe @shushu__tong @andotherstories @swarovski @stellamccartney
延伸閱讀
相關影片
