電影美學源於生活 | 霍佩詩、張栩冰
Sc1A - 基隆街 - 霍佩詩、張栩冰
#vol.4
Sc1A - 基隆街 - 霍佩詩、張栩冰 #vol.4
安靜悠閒的下午，Ceci（霍佩詩）與阿冰（張栩冰）換上攝製隊準備的服裝，坐喺布販攤檔隔離，此刻猶如漆黑中的螢火蟲，惹來途人好奇的目光，但二人置若罔聞，一邊打量大南街，一邊閒聊著。
Ceci：「我多數由呢度一直殺落去，妳嘅路線會係咩嘢呀？」阿冰看了一眼四周：「我會由後面嗰條，醫局街，陳生嗰度呢，由嗰度開始。」Ceci：「嗰條係荔枝角道呀。」阿冰笑笑口：「Sorry，我路痴嚟。」
原來，二人經常來深水埗跑Props，一般由荔枝角道的回收舖開始，然後過大南街買布，接著去鴨寮街買一些銅呀、鐵呀，手錶之類的雜物。我問她們如此舟車勞頓地跑Props，會很感到厭煩嗎，二人不約而同地搖頭。
阿冰：「其實呢度有好多新舊融合嘅嘢，你可以見到舊唐樓下面有間新開嘅文青Café，有好多視覺上嘅Reference。」Ceci接著說，跑Props的過程會看見很多人的生活，而這種生活正是創作的來源。Ceci ：「因為我哋係做三角形[1]，唔係做對白。三角形入面嘅故事，唔係得我哋兩個嘅生活咁簡單，係可以有好多人、唔同人嘅生活模式。」
分工
的確，不同人有不同的生活模式，同樣，不同人也有不同的美學觀念。二人共同擔任電影《七月返歸》的美術指導，免不了磨合與分工。阿冰：「好多時候，我俾Idea A，佢俾Idea B，然後改下改下，變咗A+B嘅Plan。」Ceci補充道：「因為你（阿冰）我比較鍾意Pattern，阿冰鍾意Texture，鍾意嗰種實感，Raw味好重。」阿冰：「所以我哋夜晚會傾好長嘅偈，會不停去Question大家，去Come up一啲Idea出黎。」
到拍攝的時候，二人的分工又不一樣。阿冰：「佢（Ceci）主打後排攻擊，我就主打前排。」阿冰會跟現場，負責Handle導演的想法。而Ceci則準備下一日的Shooting或者跑Props。Ceci：「我嗰邊搞掂就會返過嚟（現場）做紙紮，同埋去了解阿冰嘅心理狀況，睇下佢有冇撞鬼，有冇驚驚。」嗯？做紙紮！？那不是訂做的嗎，這門手藝妳哋又識？問題一出，二人露出詫異的表情，異口同聲：「乜你唔知咩！？」
美術部，又名紙紮部
這又是一個Budget的問題，阿冰：「試過Quote啦，但太貴，Afford唔起個價錢，所以美術部變咗做紙紮部。」聽罷，筆者都感到一陣唏噓，我問她們是否本身學過紙紮？不問還好，一問兩位幾乎企起身，起哄：「冇囉，冇學過，你邊度有一科係教紙紮㗎？」「你諗一諗先，我哋冇跟師傅㗎。」冇跟師傅，又冇相關知識，那妳們是如何扎出來的？這時候，Ceci不好意思地笑笑口：「其實呢，我同佢會分別去紙紮舖，喺人地個門口，偷睇人哋係點扎」 阿冰：「但睇人哋嘅紙紮呢，係Print out 多，唔係我哋想要嘅嘢」於是，她們二人一邊偷師，一邊自己研究，最後才成功製作出樣式繁多又精良的紙紮公仔。
說起紙紮公仔，二人幾乎到了走火入魔地步，Ceci：「我哋會成日鬥做一個靚嘅紙紮道具㗎，但都係佢贏多。」怎樣分勝負？阿冰：「獲得吉鏡Closeup 就贏」得獎作品都有哪些？阿冰：「紙紮屋、紙紮大肚婆」Ceci：「有時啲新加嘅嘢，我哋會好用心咁去搏佢，要呢三秒全部都係我哋嘅嘢，要演員都冇鏡頭呀。」
看見她們對紙紮的投入程度，筆者都不禁寫個服字，連隨問她們天價紙紮用品都學得識，可以試下轉行喎。二人對望一眼，誠懇地說：「我哋有諗過，真係開舖！」
提名的意義
對於獲提名第四十二屆香港電影金像獎最佳美術指導，二人有何感想。
Ceci一臉笑意：「我係驚訝嘅，有一部份係開心啦，原來小成本電影都有人欣賞，而知道我哋兩個嘅存在。」阿冰：「除咗驚訝之外，另外一個感受係好榮幸，竟然可以同前輩、師父同框，算係一個唔錯嘅成績表。」
第一次提名，你們會緊張嗎？二人想了想。
阿冰：「其實係有啲壓力嘅，本身我係抱住一個，儘全力去做嘅心態。但宜家我就會覺得，我係咪要諗更多，不停咁反覆諗呢步有冇錯呢。」
Ceci：「呢個提名都提醒咗我入行好多年啦，要提住自己唔可以懶，點樣去做得更好，話俾人聽，我哋都值得俾人睇到。」
後記
還記得當年筆者年少春衫薄，聽聞過一個關於Ceci的傳聞，大意是她入行不久，擔任美術助理時，曾對美術指導張兆康，講過一番豪言壯語。
問題一出，Ceci 笑得花枝亂顫，猛地點頭。Ceci：「我記得呀，我話，我要做佢個位呀嘛！」阿冰側目：「好霸氣！」Ceci稍稍平復情緒後，開始復述當日的情況，當時二人正在電影《激戰》的劇組，一天工作完畢，乘船從澳門返港。航程中，阿康問Ceci往後有什麼打算，想做什麼崗位？急性子的Ceci衝口而出：「我要做你個位！」Ceci解釋到，她的意思是要成為美術指導，並非要取締他。
而這件事，亦成為二人日後的笑談。
-
註[1]：三角形是指在劇本格式中用以作陳述場景、動作指示之演出說明。
Text 阿信
Photographer @hahahahaharrisss @makyau2
Photo Assistant @jackyuen712 @cccarol.c
Stylist @mildredlo
Art direction @Hahahahaharrisss
Makeup&Hair @arsez.makeup
Video @amhong_editing
Graphics Design @yikki.design
Wardrobe
(冰）
Shirt @fromclothingof_official
Leather vest & skirt @charlottengstudioofficial
Boots @bothparis
(Ceci）
Outfit @fromclothingof_official
Boots @bothparis
延伸閱讀
相關影片
