享受最真實演出 | 區嘉雯
Sc2 - 日 - 高先辦公室 - #區嘉雯
#vol.5
Sc2 - 日 - 高先辦公室 - #區嘉雯 #vol.5
女主角
不知是否因為區嘉雯曾是中學老師，她端莊地坐下來，句句字正腔圓，溫文而鏗鏘有力，讓我不自覺乖乖地坐直了身子。舞台劇演出近四十年，在《從今以後》首次擔任電影女主角，區嘉雯：「對我嚟講就梗係一個大挑戰嚟嘅，不過我覺得阿Ray(楊曜愷)你都夠膽喎吓！你信我呀」Ray在旁一笑，「你信得過我咪盡量做囉，我覺得我盡咗一己之力，得就好好，唔得都盡咗力，Limit係得咁多咁冇辦法喇。」區嘉雯實在是太謙虛，事實是她首部電影作品《叔・叔》已奪得電影金像獎的最佳女配角，而她在香港舞台劇獎更是三屆最佳女主角。
了解所有人物
一句「盡一己之力」，絕非虛言。Ray說不同演員有不同習慣，一些演員喜歡讀熟劇本後，每一天在拍攝現場聽導演指示，而區嘉雯卻是預習型演員。她細讀Angie的人物小傳，會就細節向導演查問，務求完全了解人物的想法。「我地舊一輩嗰啲通常希望睇晒成個劇本，至少個腦裏面有一個人物小傳，但係阿Ray好好，就係因為佢做晒每個人嘅人物小傳畀我哋，譬如我會知道琳琳姐個角色嘅前半生，點樣同我互相扶持。」不止多對手戲的角色，連親戚朋友的小傳她也一一細讀，仔細揣摩與各人的互動。區嘉雯說，能夠與素不相識的對手演出熟絡的感覺，是因為真的已經了解人物角色的背景，演起來時才能感覺與對方結識了數十年。
對於Angie這個角色，起初她也有疑問，為什麼Angie會選擇打官司，而不是回老家和父母一起住，又或者提議為Victor照顧嬰兒一起居住？她想過很多不同的可能性：「可能我係從區嘉雯自己角度去問，Ray解釋完畀我知之後，原來Angie係咁睇嘢嘅，咁我再諗去諗下，如果成個結構來講，咁樣睇係啱㗎喎。」
不看重播
區嘉雯的另一個特點，就是她從來不「睇Playback」。每拍一個鏡頭拍，大部分演員都會與導演一起在小屏幕前看重播，檢討自己剛才的演出再作調整，然而區嘉雯卻是從來都不看重播。
說到看不看重播，首先要說舞台劇和電影的表演經驗。說到演出的體驗，區嘉雯：「我自己係舞台劇出身，我梗係鍾意舞台劇多啲，因為嗰個一氣呵成嘅感覺，作為一個演員，係過癮好多嘅。但係作為電影演員就冇咁過癮，作為導演同剪接就過癮好多。」區嘉雯享受演出時的一氣呵成，感覺最自然真實，但如果看了重播，她在下一次演出時便會刻意。例如，在她認為最難的那場律師樓戲，要就不同機位角度哭好幾次，非常考驗演技：「如果睇Playback，你可能唔係好natural，咦嗰度喊得唔夠喎，下一次出力要喊多啲，就咁已經係pretentious咗。」因此，即使睇Playback已經成為主流習慣，甚至有些人會覺得她奇怪，但區嘉雯仍然會站在一旁，不看重播。
命中注定的一場雨
問到區嘉雯最喜歡哪一場戲？嘉雯姐二話不說地答是最後一場吻戲。那時全劇最後一幕戲，同時也在拍攝的最後一天：「最尾嗰個scene係好奇怪嘅，好似冥冥中有啲嘢係注定，注定當日要落一場雨。」劇本原先寫那一場戲是在風和日麗的湖邊，相當詩情畫意。但拍攝當日下大雨，時雨時停，好不容易設好機燈後，突然又來一場雨，二人唯有硬著頭皮去演，可是樹上的水不停滴在她們臉上，完全拍不了。由於資源有限，很難另覓日子再拍。區嘉雯：「咁卒之就喺個亭裏面拍，反而仲好，當日天色昏暗，但兩個人嘅關係係光明嘅，問題係社會同埋發生嘅事，係唔光明嘅。」雨中的小亭，這個半隱閉半開揚的空間，好比戲中一對女同志似是被接受卻又被排斥的矛盾。導演和演員們都覺得這樣的一幕最好，上天給電影劃了一神來之筆。
慢活
演出近四十年，現在處在演藝事業的另一個高峰，但區嘉雯表示，她是比較被動的演員，也沒有經理人：「而家我71歲，我想享受生活，因為唔知自己仲有幾多年命，唔知自己表演生涯仲有幾耐，如果突然間唔記得嘢，咁你就唔做得㗎喇喎，所以而家我係想慢活。」在慢活的日子，她會不時做運動，又會到惜食堂做義工，服務社區長者。歲月難免有痕跡，她感到自己現時的能量水平，與年輕時相比已經不同：「我以前唔係咁容易攰嘅人，我而家會攰。」
話雖如此，開拍《從今以後》之前，區嘉雯才剛剛完成了十四場的舞台劇《有人出租》；《從今以後》還未上畫，她另一套主演的《金池塘》已經入臺：「《金池塘》又係成噸對白啊，呢排想慢活都唔得！」
-
Text 朱鳳翎
Photographer @hahahahaharrisss
Photo assistant @jackyuen712
Special Thanks @goldenscenehk
#時地人事 #sincetheyrunscene #vol5 #從今以後 @allshallbewell.movie #楊曜愷 @ray.yeung.filmmaker
延伸閱讀
