後記：努力就能成為服裝指導嗎？｜服裝指導篇 專訪 葉嘉茵
#vol.6
《九龍城寨之圍城》《梅豔芳》《智齒》 服裝指導
#vol.6 《九龍城寨之圍城》《梅豔芳》《智齒》 服裝指導
服裝表
每一部電影都會有一份服裝表，製作方法也不勝枚舉。而Karen的做法，是盡可能把資料補充到最細緻，直至牢記心中。
「就算《梅艷芳》都好，主角有九十幾套衫，拍完兩年我都仲記得佢邊一場，著咩衫。」
剛入行時，Karen會用筆記簿紀錄低，除了每場戲的主角服飾外，同場配角、臨時演員的服飾也會一一紀錄下來。時移勢易，為了提高效率，她已轉用手機Apps 製作服裝表，隨時記下腦海閃過的小點子。
「我會將所有嘢做一個reference，分每個人，大概俾幾張相，衫係點，頭係點，妝係點。Even background我都會用另外一個Folder，係寫住Background咁。」
與演員相處之道
除了導演以外，服裝部是與演員打交道最頻密的部門。Karen提到與演員溝通須要有耐性。有些演員會觀察其他角色的服飾，為了讓自己更亮眼，他們都會提出自己的意見，不論是顏色配搭，還是飾物加減，盡可能讓自己脫穎而出，遇上這樣的情況，Karen半開玩笑地說。
「首先，係令自己平靜落嚟先，呢樣嘢好重要。跟住用一啲中和嘅方法去解釋同協調呢件事，每個演員都有自己嘅想法，想自己喺套戲入面係最好嗰個，慢慢氹下。某程度上，我哋唔係淨係買衫，滿足導演嘅要求，滿足劇組嘅要求，其實我哋都係一個PR，每一日都係，所以我覺得自己嘅Acting都幾好，係好攰嘅。」
Karen還提到，服飾的舒適度也是重要的一環，因為演戲涉及身體語言，，尤其是拍動作戲，如果件衫好緊，阻礙了動作，會影響演員的表演。
「衫係好幫到演員去感受到個角色係咩嘢，佢感受到個角色嘅時候，佢會演得比較舒服。」
做咗 ｜做好
問及近年電影美學的轉變，Karen思考片刻，表示轉變最多的，並不是美學上，而是工作態度。如今的工作氣氛很容易會落入「求做咗，而唔係求做好」的心態。
至於原因，Karen說這與錢、Budget分不開，在資源有限的情況下，「求做咗」已經不容易，「求做好」會更辛苦，但她堅信接得套戲，「求做好」的心態，先有嘢袋得走。
「我覺得個要求一定要有，唔係求其著咗件衫上去，係要啱嗰個角色，著得靚都係其次，啱嗰個角色最緊要，同埋個質感好重要。」
從前
訪問接近尾聲，問起Karen入行前的經歷。她說當年在Poly修讀服裝紡織，每日放學第一個「蒲點」就係深水埗。
「成條基隆街啲布行我都識嘅，以前唔係café黎，全部係布行。舊時係唔俾你剪辦布㗎嘛，我哋要自己去溝掂曬啲老闆，同佢Friend曬先得。」
Karen 對各布檔的位置亦然記憶猶新，從華發轉出來有間布檔，老闆係蘇生、蘇太。隔離唐二樓，有間專賣靚絲綢、靚布嘅舖頭，老闆叫周生。
「我同蘇生、蘇太好Friend，成日坐曬入去，佢哋仲請我飲檸檬茶嗰啲嚟。佢哋見到我，會話黎咗呀，我話係呀，落黎摸下啲布。你要摸布先知，你讀緊嗰個布係咩布。一定要實質去摸，買衫都好一定要實質去摸件衫，你先至會知，著上個演員度會係點樣。」
當年的資訊科技與現今相比，可為差天共地，要印證紡織相關的知識，幾乎同中醫診症一樣，要「望、聞、問、切」。望，睇多哋唔同類型嘅時裝書。聞，落布行了解布匹的行情。問，當年要散買一兩塊布並非易事，要與布行老闆關係熟絡，先有機會散買。切，要親身摸過塊布，先真正感受到布匹的質料。
香港以前的布行，可以用群英薈萃來形容，一條街幾乎有齊世界各地的布匹。但歲月悠悠，如今布行已是夕陽餘暉，光輝不再。
「香港會入呢「拃」布嘅布行已經執曬，退曬休，全部都好老㗎啦。我尋日仲撞到周生呀，喺深水埗同佢傾咗成個鐘頭偈。落大雨喺深水埗啲布檔側邊，好似好浪漫咁傾咗成個鐘頭偈，佢話好懷緬以前喺深水埗嘅日子，佢睇住成個行業興盛，又睇住佢慢慢衰落。」
努力就能成為服裝指導嗎？
勤力係必須，係基本功，要在服裝部走得更遠，必須具備Art Sense。
「你幾勤力都好，而你冇一啲關於Fashion上或者服裝上面嘅sense，你做唔到。」
至於什麼是Art Sense，Karen 沒有一個肯定的答案，這是一個比較複雜而且高層次問題，它可以是天賦、是閱歷、是興趣、是心態、是專注，總之不一而足。
- 完 -
Text 阿信
Photographer @hahahahaharrisss
Photo assistant @jackyuen712
#時地人事 #sincetheyrunscene #vol6 #服裝指導 #葉嘉茵 #九龍城寨之圍城 #梅豔芳 #智齒 #第八個嫌疑人 #低壓槽
延伸閱讀
