「一個好嘅老師，一班聽話嘅學生，Get it done！｜YY Lam 林溢欣

封面人物

Jul 5

Written By 時地人事 Since They Run Scene

#vol.7

Scn1 - 試當真Studio - 黃昏/內 - YY Lam

#vol.7 Scn1 - 試當真Studio - 黃昏/內 - YY Lam

訪問當日係電影《公開試當真》@dse.film 媒體日，到訪的媒體絡繹不絕，工作室瀰漫著一股忙碌的氣氛，鍵盤敲擊聲，滑鼠點擊聲此起彼落。訪問開始前，我與工作人員閒聊，得知主創人員從上午已經開始接受訪問，起碼要到晚上10點先收工。

我內心不禁打起小算盤，死火，佢哋忙咗成日，陣間訪問會唔會謝曬！？這個念頭剛冒起，就被幾聲大笑打斷，我從室外走廊探頭一望，只見YY Lam @yylamjayden 與許賢 @official_huiyin 坐在課桌前有講有笑，神采飛揚，就憑佢哋講嘢嗰道「中氣」，感受到狀態大勇。

片刻後，訪問開始，我問出縈繞心底多日的問題。

—— 何謂有效教育？

《公開試當真》一片中，為了幫阿康 @tnhong_084 在中學生涯最後四個月，燃燒激情，攝製隊安排了堪稱殿堂級名師團隊幫阿康補習，務求喺短時間內成績逆襲，考入大學。如此帝皇級享受，遠非一般學子可以享有，那麼撇除這特殊情況，我很好奇喺兩位眼中，普通人適用的有效教育又是什麼呢？

有效教育

YY 沈吟片刻，說所謂有效教育，並非三言兩語能說得清楚，但籠統啲講，就得一句：

「一個好嘅老師，一班聽話嘅學生，Get it done！」

咁簡單？往大方向諗，係，就係咁簡單。

但實際情況卻背道而馳，他覺得如今的教育變得不再純粹，行政輔導工作佔據教職員大部分時間，同學與老師的關係日漸疏離。

「宜家個社會太文明啦，太多心理學嘅嘢加落去，又要課堂管理，又要成長評估，又要心理輔導。」老師的工作不止是傳道、授業、解惑，更要簽回條，寫評核報告，回條多起上黎，一個禮拜就二十幾份。如果韓愈生於呢個世代，《師說》可能要重寫。

當老師肩上嘅擔子越來越重，處理公務已經費盡九牛二虎之力，哪裏還有力氣與同學建立良好關係，師生之間的信任度變低，老師又如何勸學呢。YY 回憶當年讀書的時後，與老師不說親密無間，都至少亦師亦友。他的老師們有一套很人性化的教學理念，相信：「Play hard，你就會Work Hard，你玩得呢，你返黎就會讀書。」

我問老師們在Play Hard方面有何建樹？ YY 流露出滿足、愜意、舒爽的神情，似乎在回味當年的青蔥歲月，然後才輕描淡寫地說。

「我喺嗰間中學讀書咁多年，暑期係冇暑期作業——」

沒有暑期作業的暑假，我以為只存在於神話世界，原來現實中是有一群幸福的人享用過。筆者讀嗰間學校，唔單止夏天有暑期作業，有時做唔曬，秋天都仲有暑期作業。老師們的理念，筆者由細聽到大，但以我個人經驗話俾我聽，Play Hard，只會Die Hard，為何YY卻受用，而我卻失效呢？

「你知唔知點解？」
「願聞其詳」
「係Motivation！」

動機

YY 說得擲地有聲，那神情就好似當年Kobe Bryant 說出那句名言「Have you ever seen the scene of Los Angeles at 4am？」一樣。他說大部份學生就是缺乏讀書的Motivation，你同佢講讀好書，廿年後會賺到錢；讀好書，兩年後可以入大學。其實，兩年同廿年對於他們來說都係太遙遠的事，激發不了他們。

「咁你讀書嘅Motivation係咩？」

YY想了想，說出兩個字
—— 在意

他很介意別人的目光，尤其是經歷過一次成功後，會很抗拒失敗。他憶述中六的時候文學曾經考獲全級第一，當時面對老師期望的目光，同學崇拜的眼神，腦海深處產生了一個念頭：

「今日起，個個都會Expect你之後嘅成績名列前茅，如果有一日跌出全級頭十，你就係一個失敗嘅人。」

就是這種強烈的「在意」，推動著YY求學路上不斷前行。

「人成長嘅前期要介意人哋嘅目光，因為介意人哋目光係會令到你邁向成功。到你成功嘅時候，就要學識唔好介意人哋目光。」